الخميس، 29 ديسمبر، 2011

نص حالة


ياللى ناسية إنى شاعر
قلم فـ بحر الشعِر غاص
سهل احبك فى بيت قصيدة
وارسمك لوحة برصاص
واما اكرهك اكتب عريضة
وصورتك احرقها وخلاص
عُمر حزنى يادوب دقيقة
كام دقيقة من الرُخاص
وارجع افرح ويا غيرك
فيلم تانى وعرض خاص
مانتى برضو نُص حالة
نُص من ضِمن النُصاص

الأحد، 18 ديسمبر، 2011

طَرَف تالِت


طَرف تالت ماسك اجندة
بين صوابعه الخارجية
قَتل الشيخ حَرق المَجمَع
براءة الجيش نامى يا داخلية
ها يا ثوار ما تطّفوا النار
فين ثورتكو السلمية ؟!!
بتلعب كورة على صوت شماريخ
بين العسكر والحرامية .

مجلسنا يا مجلسنا يا مجلس
وانت مشير والنعمة كويس
كل يوم تِصدر فى بيان
يلقيها فنجرى وعنان
وتشاور عواجيز بتهيس

كلمة وقالها الجنزورى
مظاهرتكم واقفة فى زورى
هاتسيبونى اشوف شغلى
ولا اخرها حاييجى دورى

حزب شيوخ بمنطق مشروخ
لو البنات لابسين باديهات
غضو النظر ع الانتهاكات
خايفين على كرسى وطبلية

وانتى نازلة ليه؟
والثورة دى ايه ؟
والله ماعرف يا سعادة البيه
بدور على عيش وحرية
وعدالة اجتماعية
لا لقيتها فى طوب الثوار
ولا حتى طابور الجمعية