الأربعاء، 2 فبراير 2011

انا مصرى



برغم حبى لك يا ريس

مصر اكبر من رئيس

مصر اكبر من برادعى

حتى لو باعها برخيص

مصر اكبر من اى ظابط

خصوصى لو ندل وخسيس

مصر اكبر من ميدان

اكبر من مليون جبان

اكبر من سيف الإخوان

والتحرير وعياله السيس

ومع إحترامى لك يا ريس

وتاريخك والكام إنجاز

مش هانسى طوابير العيش

وضحايا انابيب الجاز

مش هانسى جيش العاطلين

وبنات داسها قطر الجواز

مش هانسى الشرطة اللى هانتنى

وكلاب السكة اللى كلتنى

ولا سابت دمى وشربتنى

ولا هانسى عروبة رجمتنى

بقالب طوب وبيوتها إزاز

وبرغم رفضى لك يا ريس

حافتكرك بالخير يا مبارك

حافتكرك بالبدلة الميرى

وطيارة بتخوض فى معارك

حافتكرك بتحرر طابا

وقائدنا وسيد لقرارك

حافتكرك تفتح فى مصانع

وامانك فى كنيسة وجامع

وسنين العِشرة مفيش مانع

وإياك تخرج من دارك

وهاقول .. نعم .. للاستقرار

يا امريكا يا تعابين الغار

يا جزيرة يا كذب الاخبار

انا قبطى نسيب النبى

انا المصرى سِيد الاحرار

انا مصرى مؤيد معارض

ومسيحى ومسلم ورافض

انا النيل ولو دمى روافد

يروى كل مصر عمار

محمود المصرى .

ليست هناك تعليقات:

إرسال تعليق