فى إطار حملتها الإعلانية الجديدة ( مصر هتختار طعمها) تقوم شركة شيبسى باستطلاع رأى المصريين للطعم اللى بيحبوه وطبعاً لان مصر دولة ديموقراطية من حقك تختار الطعم اللى يعجبك ومن حق الشركة تعمل اللى هى عاوزاه
طبعا الاعلان غير مخصص لظهور اى حد من ولاد اللذينة عامة الشعب لانهم ماحيلتهومش يشتروا شيبسى ولا نيلة
دة لما يعرفو اصلا يجيبو الزيت والعيش والسجاير الفرط ..
النجم الكوميدى الشاب احمد حلمى اصبح رغم انه ممثل كوميدى الا انه بيعبر عن احوال وظروف كتير من الشعب المصرى وعلشان كدة حلمى اختار طعم العسل الاسود انه يكون طعم مصر لانه بيشوف فى مصر صفات حلوة تخليها زى العسل لكن حالها اللى زى الزفت خلاها عسل اسود ومنيل بـ60 نيلة .
السيد احمد عز امين تنظيم الحزب الوطنى الحاكم وطبعا الديموقراطى وصاحب اكبر مصنع حديد فى مصر والشرق الاوسط واللى اختار طعم الحديد لانه باعتباره اقوى محتكر فى سوق الحديد فى مصر وان المحتكرين ياكلون فى بطونهم نارا معدته تقدر تهضم حديد عز وتقرقش عضم المصريين اللى جمع من قوتهم 60 مليار جنيه مصرى .
الضابط احمد عثمان طبعا اهالى سيدى جابر فى اسكندرية يعرفوه كويس وبيشوفوه كل يوم فى احلامهم قصدى كوابيسهم واللى اختار طعم الدم الاسكندرانى لانه بعد ارتفاع اسعار الحمة البتلو شاف ان لحم المصريين ودم الاسكندرانية ارخص بكتير وان يقدر يقطع ويشوى من غير ما يتحاسب .
وانت هاتختار طعم ايه؟؟
محمود قلماوى .
